For di e momentu ku Jeugdreclassering haña un kaso te na e momentu ku sera un kaso tin diferente fase nan ku e Jeugdreclassering tin ku kana:

  1. Fase di Mèldu
  2. Fase di Preparashon
  3. Fase di Sondeo
  4. Traha un Plan (PVA)
  5. Ehekushon di e Plan
  6. Fase final

1. Fase di Mèldu

AJJC ta risibí un mèldu di:

  • Polis
  • Ministerio Públiko
  • Voogdijraad
  • JJIC
  • Reclassering
  • Mayor / Edukadó
  • Skol
  • Leerplichtambtenaar of Leerplichtbrigade

E kasonan ta drenta serka e direktiva di AJJC. E direktiva ta analisá e kasonan i mester parti esaki bou di e trahadonan, denter di 2 dia di trabou.

 

2. Fase di Preparashon

Promé yamada telefóniko

Na e momentu ku un Jeugdreclasseerder risibí un kaso, e tin ku tuma kontakto telefóniko ku e hóben dentro di 2 dia di trabou. E metanan di e yamada telefóniko aki ta:

  • Hasi promé kontakto ku e hóben;
  • Laga e hóben sa ku e ta di mèldu na AJJC Jeugdreclassering;
  • Traha afsprak ku e hóben pa e promé kombersashon personal pa sera konosí i e promé bishita na kas.

Kombersashon kara kara ku e hóben

Ora un trahadó risibí un kaso, dentro di 5 dia di trabou e tin ku hiba un kombersashon personal (kara kara) ku e hóben, i si ta posibel tambe ku su mayoranan.

E promé kombersashon ta tuma lugá den e propio konteksto di e hóben, kual ta kaminda ku e hóben ta biba. Si pa kualke motibu no por tene e kombersashon na kas, e Jeugdreclasseerder ta invitá e hóben i su mayornan na ofisina.

Den e kombersashon pa sera konosí lo papia tokante e siguiente puntonan:

  • Kiko ta AJJC
  • Kiko AJJC ta hasi
  • Motibu ku a mèldu
  • Forma di guia ku e hóben ta haña: “Toezicht en Begeleiding” òf “Maatregel Hulp en Steun”
  • E kondishonan poné den e vonnis
  • Yudansa obligatorio i e konsekuensianan si dado no kumpli ku e afspraknan i kondishonan stipulá
  • Sirkunstansianan di biba di e hòben
  • Problema i of yudansa ku e hòben tin mester
  • Motivashon di e hóben i su edukadornan / mayornan

Ta dependé di e situashon i e nivel di komprenshon di e hóben si e Jeugdreclasseerder ta papia di e delito for di e promé kombersashon òf di e ta toka e tema ei den e di dos kombersashon.

Toezicht en Begeleiding

E hóben ta haña e medida “Toezicht en Begeleiding” (Supervishon i Guia) na momento ku e wòrdu suspendé for di e aresto preventivo (voorarrest) te dia ku e hóben mester presentá dilanti Hues. E Jeugdreclasseerder apuntá mester hasi un investigashon di e hóben su situashon pa hinka den e Plan di Akshon i alabés supervisá i guia e hóben pa prevení residivismo. E medida “Hulp en Steun” (Yudansa i Apoyo) ta wòrdu duná na e hóben despues ku Hues deklaré kulpabel di e delitu pa kual e tabata sospechoso.

Maatregel Hulp en Steun

Si e hóben ta bou di guia den kuadro di “Maatregel Hulp en Steun”, e Jeugdreclasseerder ta hasié konsiente ku e guiansa di AJJC no ta boluntario, sinó obligatorio. Si e hóben no tene su mes na afsprak i reglanan stipulá, e Jeugdreclasseerder por para e guia. E Jeugdreclasseerder ta traha un asina yamá “afloopbericht” (rapòrt pa finalisá e trajekto di guia) i e ta mèldu e hóben bèk na Ministerio Públiko.

 

3. Fase di Investigashon

E fase aki ta dura 4 pa 5 siman. Denter di e periodo di investigashon e Jeugdreclasseerder ta mira e hóben algún biaha i alabés e ta aserká algún persona yegá di e hóben ku por duna informashon tokante e hóben. Eseinan ta: edukador, mayor, skol, organisashonan ku a/ta duna e hóben yudansa.

 

4. Traha un Plan di Ehekushon (PVA)

E Jeugdreclasseerder tin 4 pa 5 siman pa hasi un investigashon den e kaso di e hóben. E tin ku kolektá informashon pa asina e por traha un rapòrt. E rapòrt aki ta un Plan di Akshon (PVA), i e mester ta kla denter di 6 siman desde e dia ku a mèldu e hóben na AJJC. E PVA ta duna bista riba: e faktoran di riesgo den e hóben su bida, e faktornan protektivo, su metanan, i e sirkunstansianan di bida. Ta dependé di e motibu di a mèldu e hoben na AJJC ku e Jeugdreclasseerder tin ku duna un konseho tokante e medida di kastigu ku e hóben tin ku haña. E PVA ta duna tantu e hóben komo e Jeugdreclasseerder direkshon de e guia na e hóben.

Ta traha un PVA den e siguiente okashonan:

  • Ora un hóben wòrdu di skòrs wardando riba e dia ku e mester presentá na Korte
  • Den kuadro di guia despues di un “PIJ-maatregel”
  • Ora e Hues dikta ku un hóben tin ku haña “Maatregel Hulp en Steun”

Na momento e PVA ta kla e Jeugdreclasseerder tin ku pasa den esaki huntu ku mayor i hóben pa nan por sa kiko tin den dje. E proseso di guia ta di e hóben, pero e mayornan/edukadornan tambe ta wòrdu involukrá mirando ku nan lo ta esnan responabel pa progreso di nan yu.

Ta importante pa e hóben komprondé kiko ta pará den e PVA. Pa e motibu aki ta hasi uso di palabranan fasil i komprendibel pe hóben.

Semper e PVA ta wordu kontrolá i koregí dor di e spesialista di komportashon di AJJC i e direktiva di AJJC promé ku esaki bai Ministerio Públiko òf promé ku e guia kuminsá.

 

5. Fase di Ehekutashon

E Jeugdreclasseerder ta guia e hóben según metanan stipulá den e PVA i nesesidat di e hóben pa por evitá residivismo. E frekuensia di kontakto ta dependé di lokual ku e Jeugdreclasseerder a pone den e PVA. Den kasonan ku tin riesgo grandi pa residivismo e guia ta bira mas intensivo. E Jeugdreclasseerder ta hasi bishita na kas tur siman i tin kontakto telefóniko regularmente  ku e hóben, su mayornan, edukadornan i instasianan konserní. Si e riesgo pa risidivismo ta bahandano e frekuensia di kontakto tambe por baha i e bishita na kas lo por sosodé 1 biaha pa luna.

 

6. Fase final

Kada 6 luna e Jeugdreclasseerder ta evaluá e progreso di e hóben i ta traha un rapòrt di evaluashon pa Ministerio Públiko.

Na  inisio di guia den kaso di “Maatregel Hulp en Steun” kada hóben ta firma un kontrato kaminda e ta bai di akuerdo ku e afspraknan  ku a wòrdu traha e Jeugdreclasseerder i e hóben.