4 oradó internashonal

WILLEMSTAD – Den kuadro di informá, eduká i traha riba kolaborashonnan ekstenso riba e tereno di prevenshon di kriminalidat bou di hóbennan, Stichting Ambulante Justitiële Jeugdzorg Curaçao (AJJC) ta organisá un konferensia grandi titulá “E problema no ta di nos niun. E solushon ta di nos tur!” ku kuater diferente oradó internashonal, kual lo tuma lugá dia 12 i 13 di mei binidero na Hilton Hotel.
Durante tres aña di eksistensia di e fundashon AJJC, e organisashon a tuma nota di diferente desaroyonan alarmante enkuanto kriminalidat bou di e hubentut i tambe partisipashonnan den gruponan kriminal. Apesar di e resultadonan di e investigashon di Ministerio Públiko, hasí pa drs. Faber, enkuanto e eksistensia di gèngnan na Kòrsou, AJJC ke trese kuminda pa pensamentu i habri kaminda pa diálogo riba e tereno aki.

Dr. Wendell C. Wallace, un profesor i eksperto riba tereno di kriminologia na Trinidad i Tobago, lo ta e oradó prinsipal durante e konferensia di AJJC. Dr. Wendell C. Wallace tin un amplio konosementu i eksperensia pa ku prevenshon i kombatimentu di gruponan kriminal i/òf gèngnan. I e lo trese durante e konferensia di AJJC su konosementu i ekspertisio basá riba investigashonnan riba e konsepto di gèng riba e islanan den Karibe.

Huntu ku dr. Wendell C. Wallace, lo tin tres oradó for di Hulanda ku lo toka e temanan di:

  • Kon pa dil ku alumnonan problemátiko den enseñansa, duná pa sikologo di mucha sr. Jeroen Petri;
  • Dikon i kon nos por traha huntu pa logra baha kriminalidat, duná pa un eksperto di Veiligheidshuis Rotterdam, sr. Robert Ducaneaux,
  • Métodonan kognitivo i práktiko pa prevení kriminalidat hubenil, duná pa un eksperto riba e tereno di metodonan sientifiko pa kambia komportashon desviante, sra. Irma van der Veen.

Ku e konferensia aki AJJC ke trata na sigui stimulá e kolaborashon entre e diferente organisashonnan partikular i departamentunan den e diferente ministerionan pa asina prevení i kombatí e kriminalidat bou di e hóbennan di Kòrsou. E problema no ta di nos niun, pero e solushon ta di nos tur.

Pa mas informashon tokante e konferensia i tambe e fundashon AJJC por subí e wèpsait www.ajjc.org òf tuma kontakto telefóniko ku sra. Larissa Croes na 461-4552 òf 525-0917.